SchwobaSchbrich

wer koi schwäbisch koh, goht am Beschta glei wieder ronder von derra Seit, 
bevor er an Schada griagt oder Minderwerdichkeitskomplex
Fir boides oder au blos fir oins vo boide bin i nett verandwordlich. I hann se gwarnd!

Di wo Hochdeidsch redat moinet emmer, mir dädat bloss so vor ons noschwätza
ond des sei doch koi Schbrooch ond koiner däds verschdanda.
Aber mir echde Schwoba wissed scho:
S isch a Schbrooch ond mer kah viel saga ohne s Maul viel zom bewega.
Also ächt was fir effäktive.

Beischbiel gfällig?:
    Dr Norddeitsche sagt "würden Sie eventuell in Betracht ziehen,
    Ihre Aussage zu wiederholen weil ich sie nicht verstanden habe.
    Dr Schwob secht: "Hä?" ond moint s selbe.
Dr grundlegende Onderschied zwischa Schwäbisch ond de Norlichter:
Die Norddeutschen trennen beim Reden Wort für Wort innerhalb des Satzes.
DSchwobafangetanSatzamOfangohondschwätzedohnePunktondKommadurchbiszomSchluss.
Also, vor kurzem han i a ihmail griagd von oim aussam Remsdahl ond der dichdet.
Als Premiäre do uff derra Seit: oins von seine Gedicht:

Dr zahlende Computer

    Dr Frieder griagd à Mahnungsschreibà
    Ond so à Boschd, dui kàner gar et leidà.
    En Kompjuter hòt'r kauft,
    der jetzt schau drei Jòhr prima lauft.
    Zwoi Dag schbäter,
    kommt dr Vèrtretèr.
    Der Vèrtrètèr, à jong`r Mà,
    Frògd dr Frieder, ob er net zahlà kà.
    Jetzt secht dr Frieder zu deam Kerle,
    der Kompjuter ischt à Perle,
    doch ans zahlà denk i et,
    weil i dean Kompjuter het.
    Wo en kauft han, hòsch mr weisgmacht,
    dass der en oim Jòhr, sich zahlt macht.
Werner Roller, aus Schnait im Remstal.

Kommendar von mir: so koohs ganga.

Dr Bäbber.

    An Bäpper isch a Doil was henta druff bäbbig isch.
    Nett Älles was hentadruff bäbbig isch isch au an Bäbber.
    Ischs vorne druff bäppig ischs dreckig aber koin Bäpper.
    Aber an Bäbber koh au vorne druff bäbbig sei. No ischs halt an dreckiger Bäber.
    An richtiger Bäpper isch erscht an Bäpper wenner wo druffbäbbt.
    Ond ohne dasses henta druff bäbbig isch bäbbts net ond isch deshalb au koin Bäbber.
    Mr nimmt also a Stickle wo an Bäbber werra soll, machts hentadruff bäbbig ond no ischs an Bäbber.
    Wenn an Bäbber wo druff bäbbt no isch des Doil bebäbbt.
    Scheene Bäbber nennt mer au Schdigger ond die werrad gsammelt.
    So a Schdiggersammlung bschdeht braktisch aus lauter Bäbber.

Vorsicht!:

    Ss kooh sei, dass i em lauf der Zeit di Seit erweiter, 
    aber des kooh daura. 
    No nett ohgeduldig werra, 
    i hann halt au no ebbas anders zom doa.

 
  MENUE
© 2011ff: m.zinth, munderkingen, germany